मुंबई : 

 मुख्यमंत्री एकनाथ शिंदे यांच्या उपस्थितीत हॉटेल ट्रायडंट इथं शिंदे गटाच्या आमदारांची बैठकी सुरु आहे. या बैठकीत शिंदे गटाने शिवसेनेची जुनी राष्ट्रीय कार्यकारणी बरखास्त करण्याचा निर्णय घेतला असून शिवसेनेची नवी राष्ट्रीय कार्यकारणी जाहीर केली आहे.

मुख्यमंत्री एकनाथ शिंदे यांची शिवसेनेचे मुख्य नेते म्हणून एकमताने निवड करण्यात आली आहे. विशेष म्हणजे शिवसेना पक्षप्रमुखपदाला मात्र शिंदे गटाने हात लावलेला नाही.

दीपक केसरकर यांची प्रवक्तेपदी निवड करण्यात आली आहे. तर नेतेपदी रामदास कदम आणि आनंदराव अडसूळ यांची निवड केल्याची घोषणा करण्यात आली आहे. विशेष म्हणजे काही वेळेपूर्वीच पक्ष विरोधी कारवाया केल्याने रामदास कदम आणि आनंदराव अडसूळ यांची शिवसेनेतून हाकालपट्टी करण्यात आली आहे. शिवसेना पक्ष प्रमुख उद्धव ठाकरे यांच्या आदेशाने ही कारवाई करण्यात आली. त्यानंतर लगेचच शिंदे गटाने या दोघांना नेतेपद दिलं आहे.

याशिवाय  उपनेतेपदी यशवंत जाधव, गुलाबराव पाटील, उदय सामंत, शरद पोंक्षे, तानाजी सावंत, विजय नहाटा, शिवाजीराव आढळराव पाटील यांची नियुक्ती करण्यात आली आहे.