मुंबई : केंद्र सरकारच्या राष्ट्रीय ग्रीन हायड्रोजन मिशन आणि महाराष्ट्राच्या हरित उर्जा धोरण 2023 यांच्या माध्यमातून आता कोकण किनारपट्टी हरित उर्जेच्या दिशेने वाटचाल करीत आहे. विविध महत्वकांशी हरित उर्जा प्रकल्पांमुळे 50 हजारांहून प्रत्यक्ष व अप्रत्यक्ष रोजगार कोकणात निर्माण होण्याची शक्यता आहे. त्यामुळे कोकणातील स्थानिक तरुणांना रोजगाराजी संधी निर्माण होणार आहे.

येत्या तीन ते पाच वर्षांत विविध उर्जा प्रकल्पांची उभारणी होणार आहे. हरित उर्जा धोरणाअंतर्गत सरकारच्या माध्यमातून कोकणात 2.76 लाख कोटी रुपयांच्या गुंतवणुकीचे लक्ष्य ठेवण्यात आले असून गुंतवणूकीमुळे सुमारे 64 हजारांहून अधिक रोजगाराच्या संधी निर्माण होण्याची अपेक्षा आहे. यात कुशल-अर्धकुशल मनुष्यबळासाठी प्रत्यक्ष रोजगार निर्माण होणार आहेत.

पुणे, मुंबईसारख्या शहराकडे काम करणाऱ्या कोकणातील स्थानिक तरुणांना कोकणातच रोजगाराच्या संधी मिळाल्यामुळे तरुणांचे स्थलांतर कमी करण्यासाठी प्रकल्प महत्वाचे ठरणार असून कोकणच्या विकासाला नवी दिशा मिळण्याची शक्यता आहे.

दरम्यान, यात सिंधुदुर्गमध्ये सागरी वारे व सौर उर्जा प्रकल्प 8 हजार कोटी नैसर्गिक स्त्रोतांपासून अक्षय उर्जा निर्मितीवर भर, रत्नागिरीमध्ये ग्रीन हायड्रोजन व अमोनिया प्लांटद्वारे 40,000 कोटी समुद्राच्या पाण्याचे शुध्दीकरण करुन इलेक्टोलिसिसद्वारे हायड्रोजनची निर्मिती, रायगडमध्ये ग्रीन हायड्रोजन पोर्ट हब तसेच दिघी पोर्टमध्ये  20,000 कोटींची गुतवणूक करुन सागरी वाहतूकीद्वारे आंतरराष्ट्रीय निर्यातीची थेट सुविधा तयार करण्यात येणार आहे. असे प्रकल्प प्रस्तावित असल्याची माहिती प्राप्त होत आहे.