कुणबी नोंदी असलेल्या मराठा कुटुंबांना सरकाकडून कुणबी प्रमाणपत्र दिलं जात आहे. या मराठा कुटुंबांचा कुणबी म्हणून ओबीसी आरक्षणात समावेश होणार आहे. त्याला राज्याचे अन्न आणि नागरी पुरवठा मंत्री छगन भुजबळ यांनी विरोध केला आहे. त्यामुळे मराठा आरक्षणासाठी लढणारे कार्यकर्ते मनोज जरांगे पाटील आणि छगन भुजबळ यांच्यात संघर्ष चालू आहे. दोन्ही नेते एकमेकांवर आरोप - प्रत्यारोप करत आहेत. मराठा आंदोलनादरम्यान, बीडमध्ये जाळपोळ आणि दगडफेकीच्या घटना घडल्या होत्या. याप्रकरणी भुजबळ यांनी मनोज जरांगे पाटील यांच्यावर आरोप केले होते. त्यावर उत्तर देताना जरांगे पाटील म्हणाले, बीडमधली दंगल ही भुजबळांनीच घडवून आणली होती. त्यावर आता भुजबळ यांनी प्रतिक्रिया दिली आहे.

भुजबळ म्हणाले, हे अत्यंत बालिश असे आरोप आहेत. मी बीडला जाऊन इतकी मोठी दंगल करू शकतो का? मुळात मी असं करण्यामागचं कारण काय? तसेच या दंगलप्रकरणी पकडली गेलेली पिस्तुलधारी माणसं मनोज जरांगे यांची आहेत. २४ तास जरांगेंबरोबर राहणारी माणसं बीडच्या जाळपोळप्रकरणी पोलिसांनी पकडली आहेत.