सिंधुदुर्ग : कृत्रिम बुद्धिमत्ता (Artificial Intelligence - AI) तंत्रज्ञानाचा प्रशासकीय कामांसाठी उपयोग करणारा सिंधुदुर्ग जिल्हा हा देशातील पहिला जिल्हा ठरला आहे. या महत्त्वपूर्ण 'AI मॉडेल'चा सखोल अभ्यास करण्यासाठी नीती आयोगाची (NITI Aayog) उच्चस्तरीय टीम जिल्ह्याला भेट देणार आहे.

दौरा: 30 ऑक्टोबर, सकाळी 10:00 वाजल्यापासून ते 31 ऑक्टोबर, सायंकाळी 05:00 वाजेपर्यंत जिल्ह्यात असणार आहे.जिल्ह्याने विकासासाठी AI तंत्रज्ञानाचा कसा यशस्वीरित्या उपयोग केला आहे, याचे निरीक्षण आणि विश्लेषण करणे.

'सिंधुदुर्ग मॉडेल'ची राष्ट्रीय स्तरावर दखल घेण्यात आली आहे. सिंधुदुर्ग जिल्ह्याने विविध सरकारी खात्यांमध्ये AI चा अवलंब करून प्रशासकीय कार्यप्रणालीत क्रांती घडवून आणली आहे. या मॉडेलला राष्ट्रीय स्तरावर नेण्यासाठी नीती आयोग हा अभ्यास करत आहे.

 अभ्यासाचे मुख्य मुद्दे समाविष्ट खाती: आरोग्य, पोलीस, आरटीओ (RTO), जिल्हा परिषद, कलेक्टर ऑफिस अशा अनेक खात्यांच्या AI-आधारित कार्यप्रणालीचा अभ्यास केला जाईल. हे AI मॉडेल विकसित करणाऱ्या मार्वल (Marvel) कंपनीच्या टीमशीही नीती आयोगाचे अधिकारी संवाद साधणार आहेत.

अडचणींचा अभ्यास : AI प्रणाली कार्यान्वित करताना आलेल्या तांत्रिक आणि प्रशासकीय अडचणींचाही अभ्यास केला जाईल, जेणेकरून भविष्यात इतर जिल्ह्यांसाठी नियोजन करणे सोपे होईल. भविष्यातील रोडमॅप: देशातील सर्व ग्रामीण भागांना 'AI-युक्त जिल्हा' बनवण्यासाठी सिंधुदुर्ग जिल्ह्याने तयार केलेला हा 'पॅटर्न' कसा वापरता येईल, यावर नीती आयोग काम करणार आहे.

नीती आयोगाची ही टीम अभ्यासाचा सविस्तर अहवाल थेट पंतप्रधान नरेंद्र मोदी यांना सादर करणार आहे. देशाच्या आर्थिक नियोजनासाठी आणि विविध योजनांच्या आखणीसाठी नीती आयोग महत्त्वाची भूमिका बजावत असल्याने, सिंधुदुर्ग जिल्ह्यासाठी ही एक अत्यंत अभिमानाची बाब आहे.

जिल्हाधिकारी, पोलीस अधीक्षक (SP), अतिरिक्त पोलीस अधीक्षक (Addl SP) यांसह सर्व प्रमुख अधिकारी AI चा आपल्या कार्यप्रणालीत कसा वापर करत आहेत, याची माहिती संबंधित खातेप्रमुख नीती आयोगाला देणार आहेत.

जिल्हा पालकमंत्री नितेश राणे यांनी या उपक्रमासाठी मुख्यमंत्री देवेंद्र फडणवीस यांचे मार्गदर्शन लाभल्याचे सांगितले. महाराष्ट्राचे मुख्यमंत्री, राज्याचे चीफ सेक्रेटरी आणि अन्य वरिष्ठ अधिकाऱ्यांचेही या महत्त्वपूर्ण दौऱ्याकडे लक्ष लागले आहे. AI च्या दिशेने जग वाटचाल करत असताना, सिंधुदुर्ग जिल्ह्याला मिळालेला हा मान राज्यासाठी आणि देशासाठी एक 'सुवर्ण संधी' आहे.