पणजी : शोधपत्रकारितेसाठी देशभर ओळखल्या जाणाऱ्या 'तहलका'चे संस्थापक आणि माजी संपादक तरुण तेजपाल यांना एका लैंगिक अत्याच्यार प्रकरणात दोषी ठरवण्यात आले आहे. मे 2021 मध्ये सत्र न्यायालयाने दिलेल्या निर्दोष मुक्ततेचा निर्णय गुरुवारी, मुंबई उच्च न्यायालयाच्या गोवा खंडपीठाने रद्द केला आणि २०१३ मधील महिला पत्रकारावरील लैंगिक अत्याच्यार प्रकरणात त्यांना दोषी ठरवले.

याबाबत मिळालेल्या माहितीनुसार, गुरुवारी झालेल्या सुनावणीदरम्यान तेजपाल हे न्यायालयात उपस्थित होते. न्यायमूर्ती नीला गोखले आणि न्यायमूर्ती अमित जामसांडेकर यांच्या खंडपीठाने हा निकाल जाहीर केला. दोषी ठरविण्यात आलेल्या तेजपाल यांना १० वर्षांची शिक्षा सुनावण्यात आली आहे.

हे प्रकरण नोव्हेंबर २०१३ मधील आहे. ७ आणि ८ नोव्हेंबर २०१३ रोजी, 'तहलका' मासिकातर्फे गोव्यातील एका पंचतारांकित हॉटेलमध्ये 'थिंक फेस्ट' या कार्यक्रमाचे आयोजन करण्यात आले होते. यात जगभरातील नामवंत व्यक्ती सहभागी झाल्या होत्या. या कार्यक्रमादरम्यान, तरुण तेजपाल यांनी हॉटेलच्या लिफ्टमध्ये आपल्यावर लैंगिक अत्याचार केल्याचा आरोप महिला पत्रकार सहकाऱ्याने केला होता. यावेळी पीडित महिला 'तहलका'मध्ये कनिष्ठ पत्रकार म्हणून कार्यरत होती. कार्यक्रमादरम्यान हॉटेलच्या लिफ्टमध्ये तेजपाल यांनी दोनदा आपल्यावर लैंगिक अत्याचार केल्याचा आरोप तिने केला होता.

या घटनेनंतर देशभरात 22 नोव्हेंबर 2013 रोजी प्रसारमाध्यमांमध्ये आलेल्या आरोपांची दखल घेत पोलिसांनी स्वतःहून तेजपाल यांच्याविरुद्ध लैंगिक अत्याचार आणि इतर अजामीनपात्र गुन्ह्यांप्रकरणी तक्रार दाखल केली. यानंतर तेजपाल यांचा अटकपूर्व जामिन अर्ज फेटाळल्यानंतर 30 नोव्हेंबर 2013 रोजी तेजपाल यांना अटक करण्यात आली. सत्र न्यायालयात बराच काळ चाललेल्या या प्रकरणात मे 2021 मध्ये म्हापसा सत्र न्यायालयाने पिडितेच्या वर्तनावर शंका तसेच सबळ पुराव्यांच्या अभावामुळे तेजपाल यांची सर्व आरोपातून निर्दोष मुक्तता करण्यात आली. 

दरम्यान, गोवा सरकारने निर्दोष मुक्ततेच्या निर्णयाला मुंबई उच्च न्यायालयाच्या गोवा खंडपीठात आव्हान याचिका दाखल केली होती. 13 वर्ष चाललेल्या या कायदेशीर लढ्यात गोवा खंडपीठाने गुरुवारी सरकारी पक्षाचे पुरावे ग्राह्य धरत तरुण तेजपाल यांना अखेर दोषी ठरवले.