नवी दिल्ली : ईएसडीएस सॉफ्टवेअर सोल्युशनचा (ESDS Software Solution IPO) आयपीओ २८ ऑगस्ट रोजी गुंतवणूकदारांसाठी खुला होत आहे. कंपनीने प्रति शेअर ४०८ रुपये ते ४२९ रुपये असा प्राइस बँड जाहीर केला आहे. ३४ शेअर्सच्या लॉट साइजसह गुंतवणूकदारांना किमान १४,५८६ रुपयांची गुंतवणूक करावी लागेल. हा आयपीओ किरकोळ गुंतवणूकदारांसाठी १ सप्टेंबरपर्यंत खुला राहील.

७२० कोटी रुपयांचा हा आयपीओ असणार आहे. कंपनी १.६८ कोटी नवीन शेअर्स जारी करणार आहे. कंपनीचे सध्याचे गुंतवणूकदार कोणतेही शेअर्स विकत नाहीत. हा मेनबोर्ड आयपीओ असल्याने तो बीएसई आणि एनएसई या दोन्हीवर लिस्टिंग करण्यासाठी प्रस्तावित आहे. कंपनी आपल्या डेटा सेंटर्ससाठी क्लाउड कंप्युटिंग आणि इतर पायाभूत सुविधा खरेदी करण्यासाठी ५७६ कोटी रुपयांचा वापर करेल.

ग्रे मार्केटमध्ये आयपीओची दमदार कामगिरी

ईएसडीएस सॉफ्टवेअर सोल्युशनचा आयपीओ ग्रे मार्केटमध्ये 316 च्या प्रीमियमवर ट्रेड करत आहे. आजचा जीएमपी (ग्रे मार्केट प्रीमियम) 73 टक्क्यांनी संभाव्य लिस्टिंग गेन दर्शवतो.

कंपनीतर्फे या मेनबोर्ड आयपीओमध्ये किमान १५ टक्के शेअर्स गैर-संस्थात्मक गुंतवणूकदारांसाठी राखीव आहेत, तर ३५ टक्के शेअर्स किरकोळ गुंतवणूकदारांसाठी राखीव आहेत. कमाल ५० टक्के शेअर्स पात्र संस्थात्मक खरेदीदारांसाठी राखीव आहेत.

कंपनी पायाभूत सुविधा खरेदी करण्याकरिता ५७६ कोटींचा वापर करेल. उर्वरित निधीचा वापर सामान्य कॉर्पोरेट उद्देशांसाठी केला जाईल.  कंपनीने २०२६ या आर्थिक वर्षात १२०.८२ कोटी रुपयांचा नफा नोंदवला. ३० जून २०२६ पर्यंत कंपनीत ९९३ कर्मचारी होते. कंपनीची स्थापना २००५ मध्ये झाली. ही कंपनी एआय-आधारित क्लाउड सेवा, डेटा सेंटर पायाभूत सुविधा आणि सॉफ्टवेअर सोल्यूशन्स पुरवते. .

(डिस्क्लेमर : ही बातमी वाचकांपर्यंत माहिती पोहचविण्याकरीता देण्यात आली आहे. यामध्ये कुठल्याही प्रकारच्या गुंतवणुकीचा सल्ला देण्यात आलेला नाही. शेअर बाजारात गुंतवणूक करताना जोखीम असते. त्यामुळे स्वतःच्या जोखमीवर शेअर बाजारात गुंतवणुक करा. गुंतवणूक करण्याआधी संबंधित क्षेत्रातील तज्ज्ञांचा सल्ला घ्यावा.)